مصطلحات فريق الصوت في إنتاج الأفلام

هذه المصطلحات تنطبق عليها قاعدة الـ ٨٠/٢٠، بمعنى ٢٠٪ من المصطلحات إليّ تعطيك ٨٠٪ من المعرفة. مهما اتكلّموا النّاس عن الجانب العملي في الموضوع، فكل كلامهم ماله داعي إذا ما كان عندك فهم ووعي الجانب النّظري، والمصطلحات هي أعلى شيء في الجانب النّظري، لأنّه بيفهمك لمعنى الشيء..فإنت راح تتعلّم معلومات كثيرة، مو مجرّد كلمة. فشغّل مخّك يا مز! وش معنى DX معناها حوار، من Dialogue. إيش فائدة الحوار؟ شغّل مخّك شويتين! صح عليك! سرد القصة. ما عليك، عارف إنّك ما عرفت، بس تسليك. المهم، الحوار ماله فائدة غير سرد أحداث القصة، الحوار سيء جدًّا من ناحية وضع مشاعر وأحسيس وحنان وأفنان ودعاء... احم احم، في قلب المشاهد اللّطيف. وش معنى MX معناها موسيقى، من Music. إيش فائدة الموسيقى؟ تحريك قلبك الصّغير الّذي لا يتحمل! بالعربي، تعطيك ”كوم“ مشاعر، بالكيلو! الموسيقى تغطّي على كلّ شيء، على الصّورة والحوار والألوان وأي شيء ثاني تخيّل مشهد في اثنين يتقاتلوا، كل واحد قاعد يكسرّ أسنان خويّه، بس الموسيقى كوميدية، كيف راح يكون شعورك؟ الموسيقى تغطّي على أي شيء بصري في الفيلم وتحط المشاهد في حالة مشاعريّة بناءً على إليّ يبغاه الكاتب الموسيقي "Composer" وش معنى SFX هي المؤثرات الصّوتيّة، من Sound Effects. إيش فائدتها؟ نقدر نقول إضافة واقعيّة، شدّ الجذب، وإلخ... بس أهم فائدة هي، التعمّق. بمعنى... ركّز فإليّ حواليك، إيش تسمع؟ زنّة سماعات؟ تنبيهات الجوّال؟ صوت الكرسي؟ ملابسك؟ المكيف؟ أكيد في ألف شيء وشيء ثاني غير هذه، زي نبضات قلبك، سريان الدم في شرايينك وأدوعيتك، شهيقك وزفيرك، وكلّ العمليات الكيميائيّة داخل جسمك، الشيء الحلو إنّك أمخاخنا تفلفتر كل هذه المعلومات عشان لا ننجن. إذا تبغى تسمعها لازم تروح غرف مصمّمة بحيث إن ما يكون لها Room Tone، ولا تحسّب إنّها شيء حلو.

باختصار، إذا تبغى مشاهدين فيلمك يدخلوا جو، حط مؤثرات صوتيّة إلين ما تطفش. أكيد راح تحتاج موازنة للترّدّدات، وتوزيعها على السّماعات، مو بس تعلية وتوطية الأصوات، بس راج نرجع لذا الشيء بعدين. لمّا تحط مؤثرات صوتيّة كثيرة، الدّماغ يبدأ يعامل البيانات إليّ توصله على أساس إنّها من الواقع، مو بس فيلم، فيبدأ يفلتر أصوات كثيرة، ويدخل في مرحلة لا وعي. وقتها يدميك تتحكّم بالمشاهد زي الدّمية. تخلّيه يشتري منتج، يصدق شخصيّة، أو حتّى يحب شيء. هذا هو التّسويق. لمّا المشاهد يكون في حالة لا وعي من كثر البيانات إليّ توصله، عندها يكون قابل للّعب فيه وتوجيهه مكان ما تبغى. ممكن تخلّيه يبدأ يحس بالألم إليّ في ظهره! وش معنى Mixer فيه ثلاث أنواع للـ Mixer. فيه الـ Re-recording Mixer، بمعنى مكسر ما بعد التّسجيل. هو الشّخص إليّ يأخذ كل الترّاكات تبعك (حوار، موسيقى، مؤثرات صوتيّة وأي شيء ثاني) ويخلطها ويعجنها ويخبصها ويطلّع منّها ملفات التّّسليم النهائيّة "Deliverables" من مكس الـ ٧.١، ٥.١، ستيريو وإلخ...

النّوع الثاني هو الـ Production Mixer، بمعنى مكسر الإنتاج. الشّخص إليّ يكون في الموقع "Location" ومعاه شنطة حاط رأسه فيها طول الوقت! وأحيانًا يكون ماسك عصاية البوم وألف شيء ثاني. بعضهم يسمّوه Field Mixer، بمعنى مكسر ميداني.

النّوع الثّالث هوّ هذا... اللي غالبا يستخدم في الحفلات والمهرجانات

وش معنى Dialogue

الحوار

وش معنى M&E

اختصار لـ الموسيقى والمؤثرات الصّوتيّة، من Music & Effects. هو اسم يطلق لملف من الملفات النّهائيّة، يحتوي على الموسيقى والمؤثرات الصّوتيّة فقط لا غير، يعني كلّ شيء بدون الحوار. وش معنى Hertz (Hz) الترّدد في كل ثانية. بمعنى لو عندك مروحة تأخذ ٥ لفّات في كل ثانية معناتها إنّه تردّدها ٥ هرتز. طبعًا كلّ الكلام هنا راح يكون عن تردّد موجات الصّوت، المروحة مجرّد مثال. كل ما زاد الترّدّد زادت حدّة الصّوت. بمعنى، السّوبرانو مثلاً تردّده عالي، مقارنة بالبيز إليّ تردّده منخفض. وش معنى Pan توزيع الإشارة الصّوتيّة في مجال صوتي من نوع ستيريو (ثنائي، يمين ويسار) أو متعدّد القنوات سواء ٥.١ أو ٧.١ أو حتى ٢٢.٢.

وش معنى ٥.١/٧.١/١١.١

إيش القصد بالواحد؟ ليه ما نقول ٦ بدال ٥.١؟ الواحد يقصد بيه قناة مستقلّة وخاصّة بالمؤثّرات الصّوتيّة ذات الترّدّدات المنخفضة (Low Frequency Effects، اختصارًا يطلق عليها LFE) الواحد هو الـ Subwoofer ويفضّل إنّه يكون ألف واط وقطره ١٥ إنش عشان يكون عنده القوّة والحجم اللاّزم إنّه يطلع الترّدّدات المنخفضة بشكل واضح. مشكلة الترّدّدات المنخفضة إنّها تستهل طاقة عالية ومدى واسع من التّدردّدات، فـ لو حطّيتها في سمّاعات عاديّة راح تأكل عليك أغلب الترّدّدات وما يبقى شيء للأصوات بالترّدّدات العادية أو العالية. كل ما علي تردّد الصوت (تردّد عالي زي صوت الصّفارة، حاد ويزعج) فيحتاج طاقة أقل عشان ينسمع. الـ LFE في دور السينما في الغالب ٨٥ هرتز وأقل، في المسارح المنزليّة أحيانًا تكون ١٢٠ هرتز وأقل.

وش معنى ADR إعادة تسجيل الحوار بعد التّصوير، من Automated Dialogue Replacement، وعلى فكرة، ما في أي شيء أوتوماتيكي في الموضوع. شغلة مرهقة ومطفشة وتجيب القرف، نسيت... ومكلفة كمان!

وش معنى Decibel وحدة لقياس شدّة الصوت

وش معنى +48 Phantom Power أسلوب لنقل الطّاقة عبل كيابل المايكروفون لتشغيل المايكروفونات إليّ فيها دوائر إلكترونيّة، الزبدة تغذية الميكروفون بكهرباء ٤٨ فولت في الإنتاج أغلب المايكروفونات تحتاج لطاقة والمصطلح اللي تحت يفهمك أكثر

وش معنى Dynamic و Condesner هذه الكلمة بالضبط تسمعها للمايكروفون .. الـ Condesners همّ إليّ يحتاجوا كهرباء، حساسيّتم عالية، وأداء جدًا رائع، بس يحتاجوا كهرباء. الـ Dynamic ما يحتاجوا كهرباء، وقويّة، تتحمّل العنف والرّمي، كلّ المغنّيّين والمغنّيات يتسخدموها على المسرح، بس حساسيتهم مش عالية، عشان كذا ما تستخدم في الإنتاج.